Баянзүрх дүүргийн 33 дугаар хороо, Гачуурт орчимд 3 км замыг шинээр барьж буй. Энэ талаар нийслэлийн Замын хөгжлийн газрын тоо хэмжээний инженер Б.Лхагва-Одоос тодрууллаа.

Тэрбээр “Гачууртын авто замаас Баяндөхөмийн ам хүртэлх 3 км авто замын ажлын эхний хэсгийн 1.7 км замын ажил үргэлжилж байна. Үүнээс өнөөдрийн байдлаар 1.1 км авто замын ажил 95 хувийн гүйцэтгэлтэй байна. Үлдсэн 600 метр замын асфальт бетон суурь хучилтын ажлыг маргааш дуусгаад, өнгөн хучилтыг хийж, зорчих хэсгийн хөдөлгөөнийг нээнэ. “Улаанбаатар зам засвар, арчлалтын газар” ОНӨААТҮГ найман самосвал, гурван экскаватор болон хоёр авто замын индүүтэй тус ажлыг гүйцэтгэж байна. Баяндөхөмийн амын тус хэсэг нь намаг ихтэй, иргэд зорчиход хүндрэлтэй шороон замтай байсан. Шинээр зам ашиглалтад орсноор иргэдийн саадгүй зорчих нөхцөл бүрдэнэ” гэв.